ശ്രീലങ്കയ്ക്കെതിരായ ടെസ്റ്റ് പരമ്പരയ്ക്ക് മുന്നോടിയായി ഫോം വീണ്ടെടുക്കുക എന്ന ലക്ഷ്യത്തോടെ ആഭ്യന്തര ക്രിക്കറ്റിലേക്ക് തിരിച്ചെത്തിയ പാകിസ്താന്‍ താരം ബാബര്‍ അസമിന് തിരിച്ചടി. ക്വയ്ദ്-ഇ-അസം ട്രോഫിയില്‍ എഫ്എടിഎയ്ക്ക് എതിരായി ലാഹോര്‍ വൈറ്റ്സിന് വേണ്ടി കളിച്ച ബാബറിന് 28, 42 എന്നിങ്ങനെ മാത്രമാണ് സ്‌കോര്‍ ചെയ്യാനായത്. തന്റെ മുന്‍പത്തെ മികച്ച ഫോമിലേക്ക് തിരിച്ചെത്താന്‍ ഈ സീനിയര്‍ ബാറ്റര്‍ ഇനിയും അധ്വാനിക്കേണ്ടതുണ്ടെന്നാണ് ഈ പ്രകടനം വ്യക്തമാക്കുന്നത്. രണ്ടാം ഇന്നിംഗ്‌സില്‍ പുറത്തായതിന് പിന്നാലെ ഡ്രസ്സിംഗ് റൂമിലേക്ക് മടങ്ങുമ്പോള്‍ നിരാശയോടെ ബാബര്‍ തന്റെ ബാറ്റ് നിലത്തടിക്കുന്നതും കാണാമായിരുന്നു.
77 പന്തില്‍ 42 റണ്‍സെടുത്ത് നില്‍ക്കവെയാണ് ബാബര്‍ അസം പുറത്തായത്. എഫ്എടിഎ ബൗളര്‍ ഷാഹിദ് അസീസ് എറിഞ്ഞ ലെങ്ത് ബോള്‍ പുറത്തേക്ക് സ്വിംഗ് ചെയ്യുകയായിരുന്നു. ഏഴാമത്തെയോ എട്ടാമത്തെയോ സ്റ്റംപിന്റെ ലൈനിലെത്തിയ പന്ത് വെറുതെ വിട്ടിരുന്നെങ്കില്‍ ബാബര്‍ സുരക്ഷിതനായേനെ. എന്നാല്‍ ലൈനിന് പുറത്തുപോയ പന്തിന് പിന്നാലെ പോയ പാകിസ്താന്‍ ടെസ്റ്റ് ക്യാപ്റ്റന്‍ ശരീരത്തില്‍ നിന്നും അകന്ന് ഷോട്ടിന് മുതിരുകയും ഫസ്റ്റ് സ്ലിപ്പില്‍ ക്യാച്ച് നല്‍കി പുറത്താകുകയുമായിരുന്നു.
മത്സരത്തില്‍ ടോസ് നേടിയ ലാഹോര്‍ വൈറ്റ്സ് ഫീല്‍ഡിംഗ് തിരഞ്ഞെടുക്കുകയായിരുന്നു. 311 പന്തില്‍ 115 റണ്‍സെടുത്ത ഫവാദ് അര്‍ഷാദിന്റെ വിക്കറ്റ് വേട്ടയുടെ കരുത്തില്‍ എഫ്എടിഎ 84.1 ഓവറില്‍ 362 റണ്‍സെന്ന കൂറ്റന്‍ സ്‌കോര്‍ പടുത്തുയര്‍ത്തി. മറുപടി ബാറ്റിംഗിനിറങ്ങിയ ലാഹോര്‍ വൈറ്റ്സിന് വലിയ കൂട്ടുകെട്ടുകള്‍ ഉണ്ടാക്കാനാവാതെ 49.2 ഓവറില്‍ 234 റണ്‍സിന് എല്ലാവരും പുറത്തായി. 51 റണ്‍സെടുത്ത അലി സര്യബ് മാത്രമാണ് ചെറുത്തുനില്‍പ്പ് നടത്തിയത്.
രണ്ടാം ഇന്നിംഗ്‌സില്‍ മുഹമ്മദ് ഫാറൂഖിന്റെ (191 പന്തില്‍ 123) തകര്‍പ്പന്‍ സെഞ്ചുറിയുടെ ബലത്തില്‍ 59.1 ഓവറില്‍ 283 റണ്‍സ് കൂടി കൂട്ടിച്ചേര്‍ത്ത് എഫ്എടിഎ മത്സരം പൂര്‍ണ്ണമായും തങ്ങളുടെ കൈപ്പിടിയിലാക്കി. തുടര്‍ന്ന് മറുപടി ബാറ്റിംഗിനിറങ്ങിയ ലാഹോര്‍ 170 റണ്‍സിന് പുറത്താവുകയും 241 റണ്‍സിന്റെ വമ്പന്‍ തോല്‍വി വഴങ്ങുകയും ചെയ്തു. 44 റണ്‍സെടുത്ത വിക്കറ്റ് കീപ്പര്‍ ബാറ്റര്‍ സെയ്ന്‍ ബിന്‍ ഫാറൂഖാണ് ലാഹോറിന്റെ ടോപ് സ്‌കോറര്‍.
നവംബര്‍ 9-ന് റാവല്‍പിണ്ടിയില്‍ ശ്രീലങ്കയ്ക്കെതിരായ ടെസ്റ്റ് പരമ്പരയിലെ ആദ്യ മത്സരം ആരംഭിക്കാനിരിക്കെ, ആഭ്യന്തര ക്രിക്കറ്റില്‍ കളി മെച്ചപ്പെടുത്താന്‍ ക്യാപ്റ്റന്‍ ബാബര്‍ അസമിന് ഇനി അവസരം ലഭിക്കില്ല. മത്സരദിനത്തില്‍ കളിക്കളത്തില്‍ കാട്ടുന്ന പ്രകടനമായിരിക്കും ഇനി ഇരു ടീമുകളും ഏറ്റുമുട്ടുമ്പോള്‍ നിര്‍ണ്ണായകമാകുക.
content highlights: Babar Azam shows frustration and slams his bat after another poor performance